„Vot taidi vot i baltviņi!” jeb gaidot ciemos Valentīnu Lukaševiču

„Muna volūda – nalela sūma.
Divim kukuleišim i vīnai golvai.
Cyti sapierk vysu iz nedeli,
A mes kotru dīnu iz veikalu.
Muna volūda palīk boltuoka.
Vairuok kriejuma līkom zupā.(..)”
Itūs ryndu autors ir navīns cyts kai Valentins Lukaševičs  –  latgalīšu ailinīks, rakstnīks, literaturzinuotnīks, latgalīšu postmodernuos literaturys aizsuociejs nu Riezeknis. Dzims 1968. goda  27. oktobrī. Beidzs Riezeknis 5 vydsškolu (1986), Daugovpiļs Universitetu (bakalaura grāds 1993, magistra grāds 1996). Nu 1993. goda losa lekcejis Daugovpiļs Universitetā. 2008. godā īgivs filologejis doktora grādu par disertaceju „Latgalīšu 20. godusymta proza Latgolys literariskajā pludotā”.

Pyrmuo publikaceja – dzejūls „neticiet varenajiem...” – publiciets laikrokstā „Darba Karogs”(1989). Juo ailis var skaiteit laikagruomotā „Tāvu zemes kalendars”, laikrokstā „Mōras Zeme”, žurnalā „Jaunuo Dzeive”, almanahā „Luna”, latgalīšu jaunūs literatu kūplasīnī „Pagrauda”(1999) i ct. Caur sovu pyrmū gruomotu „Seppuku iz saulis vādara” (1995, kūpā ar Oskaru Seikstu) jys ir devs kvalitativi jaunu pagrīzīni latgalīšu poezejā. Sarakstejs pyrmū postmodernizma romanu latgalīšu literaturā „Valerjana dzeive i redzīni” (1996, kūpā ar Oskaru Seikstu).
V. Lukaševičs ir daudzu latgalīšu muokslinīku dzīšmu tekstu autors. Par pīmāru latgalīšu rokmuzykants Sovvaļnīks 2009 i 2011 godā ir izlaids ar Valentina Lukaševiča vuordim komponātys dzīsmis („Aiz azara bolti bārzi” albums „Sūpluok”). Grupai „Dabasu durovys” ir tapuse dzīsme „Veikala dadzynuošona” (aile „Meikulam sābri nūdadzynuoja veikalu”, kruojums „Bolti burti”)
Šūgod (2012) ir sajiems Latvejis Literaturys Goda bolvys specbolvu – eipaši nūtikumi Latvejis rakstnīceibā 2011 – par aiļu gruomotu „Bolti burti” (izdeviejs Latgolys kulturys centrs).
Vairuokuortiejs dažaidu nominaceju Latgolys golvonous kulturys goda bolvys „Boņuks” īguviejs (pīmāram, dzejūls „Pajem i apsasiesti zīmys klusūs vokorūs” bolva nominacejī „Lobuokuo dzeja”(2011)).
 

„Aizīmu iz bibliotēku paskaitiet pats sovys gruomotys.
Da ostoinim verūs iz meitiņu mugorom.(..)”
„Seppuku iz saulis vādara” (1995, ailis, kūpā ar Oskaru Seikstu), Valerjana dzeive i redzīni (1996, romans, kūpā ar Oskaru Seikstu), „Kuozynda” (2005, ailis), „Vot taidi vot i batvini” (2006, ailis), „Bolti burti” (2011, ailis), “Latgaliešu-latviešu vārdnīca”(2011, vuordneica).

„Dīnā nav izšireibys storp zvaigznem i sputnikim.
Sādūt sātā – storp slīkom i putnim.”
17. decembrī 12.00 Bolvu Centrāluos bibliotekys zālī bīs laseituoju tikšonuos ar Valentinu Lukaševiču.
Naasi „slīka”, nasiedi „sātā", bet atnuoc i uzzini vaira!