Pītera Miglinīka gūdam
Pītera Miglinīka gūdam
(Ontons runuoja itū runu 2010.godā Viļakā Pitera Miglinīka 160 godu jubilejis pasuocīnā)
Mes asom te – Viļakā; svātkūs, kas myusus vīnoj vīnā, kūpeigā, dvieseliskā i mīseigā Latgolā. Kas tys ir, kas myusus sasauce Viļakā, kas myusūs īsieja apjausmi, ka mes asom bruoļi i muosys – na viņ vakar i šūdīņ, a taidi byusim i reitu, pareitu, aizpareitu ..? Itei nacyluo pīminis zeime viesta; ka myusus kūpā sasauce Pīters Miglinīks – myusu tautys dyžais dāls; styprais gorā i mīsā, pylnais idejuom par latgaļu spāku i vari pastuoveit par sovu saimistiskū dzeivi, sovu goreigū gudreibu, sovu volūdu, sovu kulturu i sovu saimi. Jys myusīm ir atstuojs desmit myužu myužūs pyldamūs baušļus. I tī ir:
1. ceineitīs par taisneibu,
2. palikt uzticeigīm sovai dzimtinei i nanūkleist svešumā,
3. atgyut atpakaļ atnymtū (zemi),
4. sniegtīs piec gora gaismys,
5. ceņstīs piec saimistiskuos nūsastyprynuošonuos,
6. tureitīs kūpā i byut vīnuotīm,
7. palikt pi sovīm tykumīm i tradicejuom,
8. lītuot dzymtū volūdu,
9. styngri tureitīs pi sovys ticeibys,
10. ticeit lobuokai tautys byutīnei.
Kas beja Pīters Miglinīks? Kas ir Pīters Miglinīks? Kas byus Pīters Miglinīks?
Pīters Miglinīks, dzeivs asūt, dorbovuos kai tautys apgaismuotuojs, muižinīku apsyudzātuojs, zemnīku aizstuovs, tautys advokats.Jys beja protesta, cereibu i pošapzinis pylnūs dzīšmu sacarātuojs i dzīduotuojs sovys gitarys pavadejumā. Jys beja tīsys procesu īrūsynuotuojs, apelaceju, syudzeibu, lyugumrokstu, praseibu, viestuļu sacarātuojs sovys ( tys ir mysu) tautys vuordā i nūsyutātuojs pi tuo laika Cariskuos Krīvejis voldūšajuom instanciem. Jys beja korespondents Pīterburgys liberalajīm presis izdavumīm.
Pīters Miglinīks beja i šūdīņ vieļ ir:1.) trokīs nu Rogovkys, kurs uzadrūšynova tīsuotīs ar saimistiskū, politiskū i tīsiskū varu tūrūšajīm, 2.) gudrīs nu Viļakys, kurs pavuiceja apspīstū tautu, kai lykumeigi panuokt sovys tīseibys, 3.) tuoļredzeigais nu Makašānīm, kurs izplanavova tuoļredzeigus latgaļu tīseibu aizstuoveibys projektus i dali eistynova, 4.) ceineituojs, cītiejs i uzvarātuojs nu Ludzys, kurs atsarozdams īslūdzejumā panuoce tīsys prāvu i sevs attaisnojumu, 5.) zynuotkuorīs nu Rēzeknis, kurs vuicejuos i apgyva zineibys, lai tuos lyktu dorbuotīs latgaļu tautys lobumam, 6.) viesturnīks nu Drisys – Osvejis i Pryusejis, kurs mekleja i atroda patīseibu par latgaļu tautu i latgaļu zemiem.
Pīters Miglinīks ir šūdīņ i byus byutīnē myužu myužūs myusu tautys pruots, spāks, gūdajyutys i ticeiba, kod jū, kai Jēzu Krystu jūdu tautai, navaineigu nūtīsova i nūbeņdeja 33 godu vacumā, a navar nu tautys pīminis izdzēst vieļ šudīņ.
Pīters Miglinīks dzeivova i dorbovuos 19. gs. 60. ,70., 80. godūs, kod myusu tautai vieļ beja līgtys školys, bīdruošonuos i kulturys vaļstiska atteisteišona, kod myusu tautai vieļ nabeja sovys inteligencis, pat bazneickungi i tī beja viņ daži latgalīši.
Pīters Miglinīks piec nuovis beja nūklusāts 25 godus i tik 1908. godā juo muosys dāls Francis Kemps nūpublicej pyrmū pīminis rokstu.
Otkon paīt 27 godi i tik 1935. godā literaturvuiesturnīks Meikuls Apeļs nūpublicej gruomotā nalelu rokstu par Pīteri Miglinīku.
Otkon paīt 18 godi i rakstnīks, viesturnīks Ontons Rupaiņs izdūt vasalu gruomotu par Pīteri Miglinīku.
Otkon paīt 17 godu, voi 88 godi piec nuovis. I 1970. godā par Pīteri Miglinīku roksta Viktors Vonogs, a 1971. godā, Juoņa Cybuļska rūsynuoti i leidzekļus sameklejūšs, tieļnīki Bārtuļs Buļs ar Ontonu Velikanu izkaļ Pīteram Miglinīkam kopa pīminekli i uzstuoda Desetnīku kopsātā, a dzejnīks i režisors Ontons Kūkojs Rēzeknis teatrī īstudej lugu par Pīteri Miglinīku i ar tuos izruodiem apbraukoj Latgolu.
Paīt vieļ 22 godi i 1993. godā, Leontīnes Maksimovas rūsynuoti, Marjana Locāna vadeibā Viļakā uzstuoda pīminis zeimi Pīteram Miglinīkam.
Atīt 2000. gods i Ontons Kūkojs panuok ka Reigā Pītera Miglinīka 150. godskuortys jubileju svyn taidā pat augstā leimenī kai i dzejnīkam Auseklim. Teik izdūts skaists buklets Ausekļa i Miglinīka gūdam.
2005. godā Ontons Slišāns apbraukoj daudzys vydsškolys Latgolā stuostādams školānīm par Pītera Miglinīka dzeivi, darbeibu i nūzeimi latgaļu tautys dzeivē.
2010. godā Ruta Cibule ar Viļakys nūvoda dūmis atbolstu, ar vysu Viļakys nūvoda kulturys darbinīku atbolstu sareikoj itūs Latgolu vīnojūšūs svātkus – svātkus Pītera Miglinīka pīmiņai juo 160. godskuortā.
As ceru, as tycu, ka Ludzā tiks uzcalts pīmineklis Pīteram Miglinīkam, ,kur jys, kuoju pierstūs īspīds zeimuli, roksta apelaceju tīsai i panuok sevs atbreivuošonu.
As ceru i tycu, ka Makašānūs tiks uzcalts pīmineklis Pīteram mMiglinīkam , kur jys stuov pi smiedis loktys, gataveibā kaļt uzvarūšys idejis tautys lobumam.
As ceru i tycu, ka Rēzeknē tks uzcalts pīmineklis Pīteram Miglinīkam, kur jys – stolts jauneklis ar myrdzuma pylnuom acīm, ar īgyutajuom zynuošonuom steidzuos pi sovys tautys.
As klusebā dūmoju, ka ari kinofilma par Pīteri Miglinīku tiks radeita.
As asu lapnys, ka pīdaru itai tautai, par kuru pastuoveja i kurys volūdā runova i dzīdova Pīters Miglinīks! Tys ir lyls gūds byut pīdareigam Pītera Miglinīka tautai!
Ontons Slišāns